راتلونکې میاشت کندهار کې د غازي امان الله خان لېسټ اې جام سیالۍ پیليږي

باید وویل شي چې د زونونو په کچه د غازي امان الله خان یو ورځنۍ سیالۍ له شپږیزې کرکټ لیګ وروسته هغه سترې سیالۍ دي چې د ملي لوبډلې د لوبغاړو په ګډون پکې د بېلابېلو کټګوریو تکړه او ځلېدلي لوبغاړي لوبېږي.

د کورني کرکټ د مسوول احسان الله عبید په وینا، دا ځل مو په پام کې نیولې چې د غازي امان الله خان جام سیالۍ د کندهار په کرکټ لوبغالي کې ترسره شي چې د یادو لوبو د ترسره کېدو  لپاره مو بشپړ چمتووالی نیولی دی.

نوموړي زیاته کړه: ((په دغو سیالیو کې به د ملي لوبډلې د لوبغاړو په شمول د کورني کرکټ قرارداد لرونکي لوبغاړي، د لومړۍ درجه سیالیو ځلېدلي لوبغاړي او همدارنګه د شپږیزې کرکټ لیګ ځلېدلي لوبغاړي به پکې ګډون وکړي چې دا د ټولو ګډونوالو لوبغاړو لپاره یو ښه فرصت دی.))

د یادونې وړ ده چې د دغو سیالیو لومړی پړاو په ۲۰۱۷م کال کې پیل شوی چې سږ کال به یې د راتلونکې اکټوبر میاشتې له ۱۰مې تر ۲۳مې نېټې پورې څلورم پړاو ترسره شي.

د یادو سیالیو د لومړي پړاو اتلولي سپین غر لوبډلې، د دویم پړاو اتلولي د بست لوبډلې او د دریم پړاو (تېر کال) اتلولي بیا د مس عینک لوبډلې په خپل نوم کړې وه.