افغان لوبډلې په نړیوال جام کې خپله وروستۍ لوبه نیوزیلنډ ته وبایلله

افغان لوبډلې په روان شل اوریز نړیوال جام کې خپله وروستۍ لوبه د نیوزیلنډ لوبډلې پر وړاندې تر سره کړه. د نننۍ لوبې پچه افغان لوبډلمشر وګټله او لومړی یې توپوهنه غوره کړه.
نن د افغان لوبډلې د پیل توپوهونکو ښه پیل ونه کړ، شهزاد محمدي په ۱۱ توپونو یوازې څلور منډې وکړې او خپله ویکټ یې له لاسه ورکړه. د شهزاد له رخصتېدو وروسته رحمن الله ګربز د حضرت الله ځاځي ملګرتیا ته راغی؛ خو ځاځي هم په څلورو توپونو یوازې دوه منډې وکړې او د نورو لوبغاړو څنګ ته ورغی. د ځاځي وروسته ګلبدین نایب توپوهنې ته راغی، خو رحمن الله ګربز هم بیا ګلبدین نایب سره ملګرتیا اوږده نه کړه او د شپږو منډو جوړولو وروسته یې خپله ویکټ له لاسه ورکړه.
د ګربز له بهرېدو وروسته نجیب الله ځدراڼ توپوهنې ته راغی او د نیوزیلنډ پر وړاندې یې د افغان لوبډلې هدف لوړ کړ. نن نجیب الله ځدراڼ د ۳ شپږیزو او ۶ څلوریزو پر مټ ۷۳ منډې وکړې او ډېر ښه وځلېده. سربېره پر دې ګلبدین نایب ۱۵، محمد نبي ۱۴ او راشدخان ۳ منډې وکړې. افغان لوبډلې په ۲۰ اورونو کې د ۸ ویکټو په غورځېدو سره ۱۲۴ منډې وکړې او نیوزیلنډ ته یې د ۱۲۵ منډو هدف کېښود.
د نیوزیلنډ په توپ اچوونکو کې ټرینټ بولټ ۳، ټیم سوتي ۲، جیمي نېشم، اېش سودي او اډم میلني یو ـ یو افغان لوبغاړی له ډګره بهر کړ.
نیوزیلنډ د افغان لوبډلې له لوري ورکړل شوی هدف په ۱۸.۱ اورونو کې پوره کړ. د نیوزیلنډ لپاره په توپوهنه کې کېن ویلمسن ۴۰ ناسوځېدلې، ډېوین کانوې ۳۶ ناسوځېدلې او مارټن ګپټل ۲۸ منډې وکړې.
د افغان توپ اچوونکو له منځه مجیب الرحمن یو او راشد خان هم یو لوبغاړی له ډګره بهر کړ. د یادونې وړ ده چې راشد خان د نننۍ ویکټې په اخیستو سره په شل اوریزو لوبو کې خپلې ۴۰۰ ویکټې هم پوره کړې.
د ۲۰۲۱ کال په نړیوال شل اوریز جام کې افغان لوبډلې پنځه لوبې وکړې، چې دوې یې وګټلې او درې یې وبایللې. د نننۍ لوبې په بایللو سره په روان نړیوال جام کې د افغان لوبډلې سفر هم پای ته ورسېد.
له بل لوري باید یادونه وشي چې افغان لوبډلې د ۲۰۲۲ کال نړیوال شل اوریز جام لوبو د ۱۲ غوره لوبډلو پړاو ته هم لاره موندلې چې افغان لوبډلې یې اووم ځای خپل کړی دی.