د هېواد په ۱۲ ولایتونو کې د کلب لېول سیالۍ پیل شوې

د افغانستان کرکټ بورډ د لوبې پرمختیایي او ملي کرکټ اکاډمۍ څانګې د هېواد په بېلابېلو ولایتونو کې د کلب لېول (انټرکلب) سیالۍ پیل کړې، دغه ۳۰ اوریزه سیالۍ په ولایتونو کې د ثبت شویو کلبونو ترمنځ ترسره کېږي. 

د غه سیالۍ چې د ننګرهار ولایت ترڅنګ په خوست، فراه، پکتیکا، کنړ، جوزجان، پروان، غزني، مېدان وردګ، زابل او کندز ولایتونو کې پیل شوي له درې پړاوه سیالیو ترسره کولو وروسته به پای ته ورسېږي.

یادو سیالیو کې د ټول هېواد په کچه ۳۷۰ ثبت کلبونو د ۱۵ لوبغاړو په شتون کې د یو او بل پروړاندې په سور توپ او سپین لباس کې د سیالۍ ډګر ته ښکته کېږي، د افغانستان کرکټ بورډ د لوبې پرمختیایي او ملي کرکټ اکاډمۍ څانګې د مشر فردوس غني په وینا چې دا سیالۍ به په درېو پړاونو کې ترسره شي، چې لومړی پړاو یې د ولایت کلبونو په کچه، دویم پړاو یې د زونونو کلبونو او دریم پړاو یې بیا د هېواد په کچه د کلبونو ترمنځ ترسره کېږي.

نوموړی زیاتوي چې دغه سیالۍ به په انلاین بڼه هم نشر شي او مینوال کولی شي د لوبو ټول معلومات له کریک هیروس ویب پاڼې څخه ترلاسه کړي.
د یادو ولایتونو ترڅنګ به په نږدې راتلونکې کې د مرکز کابل سربېره په لوګر، پکتیا، هرات، مزار، بامیان، نورستان، لغمان، سرپل، ارزګان، کاپیسا او یو شمېر نورو ولایتونو کې د کلب لېول (انټر کلب) سیالۍ پیل شي.

د یادونې وړ ده چې د دغو سیالیو په انلاین بڼه د نشرېدو په پایله کې یو لوبغاړی نه شي کولی په بېلابېلو کلبونو کې لوبه ترسره کړي او یادو لوبو کې ځلېدونکي لوبغاړي به د اړوند ولایت مختلفو لوبډلو ته لاره پېدا کړي.