افغان ابدالیان د سریلانکا او ایرلنډ پر وړاندې درې اړخیزه لوبلړۍ ترسره کوي

افغان ابدالیان (د افغانستان الف کرکټ لوبډله) د روان کال په اپرېل میاشت کې د سریلانکا او ایرلنډ الف لوبډلو پر وړاندې په درې اړخیزه لوبلړۍ کې ګډون کوي. دغه سیالۍ به د اپرېل میاشتې په ۷مه نېټه د افغانستان په کوربه توب په متحده عربي اماراتو کې پیل شي چې د مې میاشتې تر دویمې نېټې پورې به یې په ترڅ کې ۷ یو ورځنۍ او دوه څلور ورځنۍ سیالۍ ترسره شي.

د دغې لوبلړۍ پیل به د افغان ابدالیان او ایرلنډ الف لوبډلو ترمنځ په څلورورځنۍ لوبه وشي چې د اپرېل میاشتې له ۷مې تر ۱۰مې نېټې به د متحده عربي اماراتو په ابوظبي ښار کې ترسره شي. د لومړۍ څلور ورځنۍ لوبې له پای ته رسېدو وروسته به د یو ورځنیو سیالیو درې اړخیزه لوبلړۍ پیل شي چې په لومړۍ لوبه کې به یې سریلانکا الف لوبډله د ایرلنډ الف لوبډلې پر وړاندې د سیالۍ ډګر ته ښکته شي.

د یو ورځنیو سیالیو په دغه درې اړخیزه لوبلړۍ کې به هره لوبډله د بلې پر وړاندې دوه لوبې ترسره کړي چې د لومړي پړاو دوه مخکښې لوبډلې به د اپرېل میاشتې په ۲۵مه نېټه کېدونکې پایلوبې ته لاره ومومي. د درې اړخیزې لوبلړۍ په پای کې به افغان لوبډله د اپرېل میاشتې په ۲۹مه نېټه د سریلانکا الف لوبډلې پر وړاندې خپله دویمه څلور ورځنۍ لوبه پیل کړي چې د مې میاشتې تر دویمې نېټې به په ابوظبي کرکټ لوبغالي کې دوام وکړي.

د افغانستان کرکټ بورډ اجراییوي رییس ښاغلي نصیب خان وویل: ((افغان ابدالیان لوبډلې تېر کال د ځوانانو د اسیا جام سیالیو اتلولي خپله کړه، چې ډېره ستره لاسته راوړنه ده. موږ د الف لوبډلې پرمختګ ته ځانګړې پاملرنه لرو، ځکه چې دغه لوبډله زموږ د ملي لوبډلې لپاره د قوي پشتوانې حیثیت لري. په تېرو دوو یا درې کلونو کې مو د الف لوبډلې لپاره ګڼ شمېر نړیوال سفرونه او سیالۍ برابرې کړې، چې پرمټ یې مو د لوبې د ټولو بڼو لپاره ډېر وړ لوبغاړي وموندل.))

نوموړي دغه راز زیاته کړه: ((د ایرلنډ او سریلانکا الف لوبډلو پر وړاندې دغه سیالۍ به زموږ د ځوانو لوبغاړو لپاره یوه بله زرینه موقع وي، ترڅو په نړیواله کچه خپلې وړتیاوې نندارې ته وړاندې کړي او خپلو مهارتونو ته لا زیاته وده ورکړي. زموږ یو هدف دا هم دی چې له دغو سیالیو اوږده فارمټ ته غوره لوبغاړي ومومو، ترڅو کله چې یاد لوبغاړي ملي لوبډلې ته لاره مومي، له هیڅ ډول ستونزې، نوي حالت یا فشار سره مخ نه شي او په خورا غوره ډول د هېواد استازیتوب وکړي.))

د یادونې وړ ده چې افغانستان کرکټ بورډ اوسمهال خپلې الف لوبډلې ته ډېر لومړیتوب ورکوي، او له وړاندې پر دوی یو ډول پانګونه کوي؛ ترڅو ملي لوبډلې ته د لوبغاړو د لارموندنې وروسته لوبغاړي له هر ډول حالت سره بلدیت ولري او له کومې ډول خنډ یا ستونزې سره مخ نه شي.

د سیالیو مهالوېش:

نېټه	لوبه	لوبغالی
د اپرېل له ۷مې – ۱۰مې نېټې	افغان ابدالیان د ایرلنډ الف پر وړاندې ( لومړۍ څلور ورځنۍ لوبه)	ابوظبي
د اپرېل ۱۳مه نېټه	ایرلنډ الف د سریلانکا الف پر وړاندې (یو ورځنۍ لوبه)	ابوظبي
د اپرېل ۱۵مه نېټه	افغان ابدالیان د سریلانکا الف پر وړاندې (یو ورځنۍ لوبه)	ابوظبي
د اپرېل ۱۷مه نېټه	افغان ابدالیان د ایرلنډ الف پر وړاندې (یو ورځنۍ لوبه)	ابوظبي
د اپرېل ۱۹مه نېټه	ایرلنډ الف د سریلانکا الف پر وړاندې (یو ورځنۍ لوبه)	ابوظبي
د اپرېل ۲۱مه نېټه	افغان ابدالیان د ایرلنډ الف پر وړاندې (یو ورځنۍ لوبه)	ابوظبي
د اپرېل ۲۳مه نېټه	افغان ابدالیان د سریلانکا الف پر وړاندې (یو ورځنۍ لوبه)	ابوظبي
د اپرېل ۲۵مه نېټه	د درې اړخیزې لوبلړۍ پایلوبه (یو ورځنۍ لوبه)	ابوظبي
د اپرېل له ۲۹مې د مې تر دویمې نېټې	افغان ابدالیان د سریلانکا الف پر وړاندې (دویمه څلور ورځنۍ لوبه)	ابوظبي