کندهار السعادات لوبډلې کابل زلمیانو ته ماتې ورکړه

‎د زونونو په کچه د اتل کلبونو ترمنځ د اتلولۍ سیالیو په شپږمه لوبه کې کندهار السعادات لوبډلې سیالې کابل زلمیانو لوبډلې ته د ۵ ویکټو په توپیر ماتې ورکړه.

‎په پیل کې د کندهار السعادت لوبډلې د لوبې پچه وګټله او لومړۍ یې د سیالې لوبډلې پر وړاندې د توپ اچونې پرېکړه وکړه. کابل زلمیانو لوبډلې د لوبې په پوره ۳۵ اورونو کې د ۹ لوبغاړو په غورځېدو سره ۲۷۵ منډې جوړې کړې او سیالې لوبډلې ته یې د۲۷۶ منډو هدف وټاکه.

‎کابل زلمیانو لوبډلې ته په توپوهنه کې ډیرې ۱۱۷ منډې رحیم منګل، ۴۹ منډې اعجاز احمدزي او ۳۳ منډې ننګیالي جوړې کړې، په داسې حال کې چې د کندهار السعادت لوبډلې رحیم خان، خلیل محمد، عارف خوشال، فرهاد ۲-۲ او نور الله یوه ویکټه تر لاسه کړه.

‎ورپسې د کندهار السعادت لوبډلې د ټاکلي هدف د پوره کولو په موخه توپوهنه پیل کړه، السعادت لوبډلې د لوبې په ۲۹،۲ اور کې د ۵ ویکټو په غورځېدو سره ټاکلی هدف پوره کړ او لوبه یې د کابل زلمیانو له لوبډلې څخه د ۵ ویکټو په توپیر وګټله.

‎کندهار السعادت لوبډلې ته عارف خوشال ۱۲۴ او نعمان شاه ۸۳ منډې جوړې کړې او د کابل زلمیانو په ګټه عبدالوهاب ۲، جمع سلطاني، ننګیالی، او اعجاز احمدزي ۱-۱ لوبغاړی وسوځولو.

‎د کندهار السعادات لوبډلې توپ وهونکی عارف خوشال چې د خپلې لوبډلې په ګټه یې ۱۲۴ منډې جوړې کړې وې د لوبې غوره لوبغاړی ونومول شو.

‎د یادولو وړ ده چې د یادو سیالیو پای لوبه به سبا په خوست کرکټ لوبغالي کې د خوست زلمیانو او کابل زلمیانو لوبډلو ترمنځ ترسره شي.